හදවතේ සිහිනය වෘත්තීය පුහුණු ව්‍යාපෘතිය ආරම්භ කිරීම
දිනය: 2020 අගෝස්තු 23
ස්ථානය: වල්පිට
ව්‍යාපෘතිය: හදවතේ සිහිනය වෘත්තීය පුහුණු ව්‍යාපෘතිය
තේමාව: නිපුණත්වයෙන් පිරිපුන් තරුණ පරපුරක් උදෙසා
2020 අගෝස්තු 23 වැනිදා මගේ ගමේ තරුණ තරුණියන් සමග හදවතේ සිහිනය වෘත්තීය පුහුණු ව්‍යාපෘතිය ආරම්භ කළා. රටක අනාගත ශක්තිය තරුණ පරපුර බවත්, ඔවුන්ගේ හැකියාවන් හඳුනාගෙන නිවැරදි අධ්‍යාපනික සහ වෘත්තීය මාර්ග වෙත යොමු කිරීම වැදගත් බවත් මම විශ්වාස කළා. එම අදහස ප්‍රායෝගික වැඩපිළිවෙළක් බවට පත් කිරීම මෙම ව්‍යාපෘතියේ අරමුණ වුණා.
සෑම තරුණයෙකුටම එකම මාර්ගය සුදුසු වන්නේ නැහැ. තමන් සතු හැකියාව, උනන්දුව සහ සුදුසුකම් අනුව නිවැරදි වෘත්තීය මාර්ගයක් තෝරා ගැනීමට අවශ්‍ය තොරතුරු සහ මගපෙන්වීම ලබාදීම මෙහි මූලික අරමුණක් වුණා. ඒ සඳහා විවිධ ආයතන සහ ක්ෂේත්‍ර නියෝජනය කරමින් තරුණ තරුණියන්ට ලබාගත හැකි අවස්ථා පිළිබඳව මෙම පළමු වැඩසටහනේදී දැනුවත් කළා.
වැඩසටහන අදියර කිහිපයක් යටතේ පැවැත්වුණා. ශ්‍රී ලංකා යුද හමුදාවට සම්බන්ධ වීමේ ක්‍රමවේදය සහ අවශ්‍ය සුදුසුකම්, නිපුණතා සංවර්ධන ක්ෂේත්‍රය යටතේ පැවති වෘත්තීය පුහුණු පාඨමාලා, ජාතික තරුණ සේවා සභාව මගින් ලබාදුන් පුහුණු අවස්ථා, ශ්‍රී ලංකා පදනම් ආයතනය යටතේ පැවති පුහුණු පාඨමාලා සහ ඉදිකිරීම් ක්ෂේත්‍රයේ රැකියා අවස්ථා වෙත යොමු විය හැකි ආකාරය පිළිබඳව මෙහිදී සාකච්ඡා කළා.
අදාළ ක්ෂේත්‍ර පිළිබඳව තරුණ පිරිසට සෘජුව කරුණු පැහැදිලි කිරීමට ශ්‍රී ලංකා යුද හමුදාවේ නිලධාරීන් සහ ජාතික තරුණ සේවා සභාවේ නිලධාරීන් සම්බන්ධ වුණා. ඔවුන්ගේ සහභාගිත්වය නිසා තරුණ තරුණියන්ට තමන්ට තිබෙන අවස්ථා පිළිබඳව අදාළ ක්ෂේත්‍ර නියෝජනය කරන පිරිසගෙන්ම තොරතුරු ලබාගැනීමට හැකි වුණා.
මෙම ව්‍යාපෘතිය ඉදිරියට ගෙන යාම සඳහා දමිත වික්‍රමසිංහ, චම්පිකා අමරසේකර සහ තේෂාර ජයසිංහ යන මහත්ම මහත්මීන්ගෙන් ලැබුණු සහය මම කෘතවේදීව සිහිපත් කරනවා. එසේම අපේ ග්‍රාම නිලධාරිනිය, විජිත් සෙනවි සහ වල්පිට තරුණ පිරිස ලබාදුන් සහයද මෙම වැඩසටහන සාර්ථක කරගැනීමට වැදගත් වුණා.
මෙය එක් දිනක දැනුවත් කිරීමේ වැඩසටහනක් ලෙස පමණක් සැලසුම් කළ දෙයක් නොවෙයි. වල්පිටෙන් ආරම්භ කළ මෙම වැඩපිළිවෙළ ඉදිරියේදී තවත් ගම්මාන සහ ප්‍රජාවන් වෙත ගෙන යාම මගේ බලාපොරොත්තුව වුණා. පසුව නාරාහේන්පිට දාබරේ මාවතේ වතු ආශ්‍රිත ජනතාව දැනුවත් කිරීම සහ ඔවුන් අතරින් පළමු කණ්ඩායම වෘත්තීය පුහුණුව සඳහා ලියාපදිංචි කිරීම දක්වා මෙම වැඩපිළිවෙළ ඉදිරියට ගෙන යාමට හැකි වුණා.
මට මෙහි වැදගත්ම දේ වූයේ තරුණයෙකුට රැකියාවක් සොයා දීම පමණක් නොව, තමන් සතු හැකියාව හඳුනාගෙන ජීවිතය ගොඩනගා ගත හැකි මාර්ගයක් පෙන්වා දීමයි. හදවතේ සිහිනය වෘත්තීය පුහුණු ව්‍යාපෘතිය ආරම්භ කළ මෙම දිනය ඒ උත්සාහයේ පළමු පියවර ලෙස මගේ සමාජ සේවා ගමනේ විශේෂ මතකයක්.
සංවාදයට එක්වන්න.