“එක පන්සලකට එක වෙබ් අඩවියක්” – ප්‍රථම වෙබ් අඩවිය පූජා කිරීම
දිනය: 2018 ජූනි 05
ස්ථානය: ජල්තර ධම්මික යෝගාශ්‍රමය
ව්‍යාපෘතිය: “එක පන්සලකට එක වෙබ් අඩවියක්”
විශේෂ අවස්ථාව: ව්‍යාපෘතිය යටතේ නිර්මාණය කළ ප්‍රථම වෙබ් අඩවිය විහාරස්ථානයට පූජා කිරීම
2018 ජූනි 05 වැනිදා මගේ තාක්ෂණික දැනුම සමාජ හා ආගමික සේවාවක් වෙනුවෙන් යොදාගැනීමේ අරමුණින් මා ආරම්භ කළ “එක පන්සලකට එක වෙබ් අඩවියක්” සංකල්පයේ පළමු පියවර ක්‍රියාත්මක කිරීමට හැකි වුණා. එම සංකල්පය යටතේ මා විසින් නිර්මාණය කළ ප්‍රථම වෙබ් අඩවිය ජල්තර ධම්මික යෝගාශ්‍රමය වෙනුවෙන් සකස් කරන ලදී.
මෙහි අරමුණ වූයේ විහාරස්ථානවල ඉතිහාසය, ආගමික හා සමාජ සේවා, වැඩසටහන් සහ අනෙකුත් වැදගත් තොරතුරු අන්තර්ජාලය ඔස්සේ ජනතාවට හඳුන්වාදීමට අවස්ථාවක් සලසා දීමයි. ඒ කාලයේ මා වෙබ් අඩවි නිර්මාණය හා සංවර්ධනය තුළින් ලබාගෙන තිබූ අත්දැකීම්, වාණිජ ව්‍යාපෘතිවලට පමණක් සීමා නොකර මෙවැනි සමාජීය වටිනාකමක් ඇති කටයුත්තකට යොදාගැනීම මගේ අරමුණ වුණා.
මෙම ව්‍යාපෘතියේ පළමු වෙබ් අඩවිය එවකට හිටපු ආරක්ෂක ලේකම් ගෝඨාභය රාජපක්ෂ මහතාගේ සුරතින් ජල්තර ධම්මික යෝගාශ්‍රමයට පූජා කිරීම එදින සිදු වුණා. ඡායාරූපවල සටහන් වී ඇති පරිදි, මා විසින් පරිගණකය හා ප්‍රදර්ශන තිරය භාවිත කරමින් වෙබ් අඩවිය ඉදිරිපත් කළ අතර, භික්ෂූන් වහන්සේලා සහ පැමිණ සිටි පිරිස ඉදිරියේ එය හඳුන්වා දීමටද අවස්ථාව ලැබුණා.
මෙම අවස්ථාව ආගමික වැඩසටහන් සහ සංස්කෘතික අංග සමඟ පැවැති අතර, මට එහි ඇති විශේෂ වැදගත්කම වූයේ මා සිතූ සංකල්පයක් ප්‍රායෝගික ව්‍යාපෘතියක් බවට පත්කර එහි පළමු ප්‍රතිඵලය විහාරස්ථානයකට ලබාදීමට හැකිවීමයි.
මගේ වෙබ් නිර්මාණ හා සංවර්ධන ගමනේ වාණිජ නොවන, සමාජ හා ආගමික සේවා ව්‍යාපෘති අතර “එක පන්සලකට එක වෙබ් අඩවියක්” සංකල්පයේ ආරම්භය ලෙස 2018 ජූනි 05 දිනය මගේ පෞද්ගලික මතක සටහන් අතර විශේෂ ස්ථානයක් ගන්නවා.
සංවාදයට එක්වන්න.